الجده فليحه منتدى المحبه الجديد

][ مقدمه الروايه ][
روايتي ليست عن الحيوانات اعزكم الله ورفع قدركم ولا عن الطيور التي قاربت
على الانقراض وعلى ساهر الي اكلنا بالمخالفات ولا على الشباب والشابات العاطلين الي ينتظرون حافز
ولا عن البرد ولا يمت للي قلته فوق ابد موضوعي هو روايه في عده صفحات كل صفحه تختلف عن الثانيه
لذالك جرى التنبيه

][ تفاصيل الروايه الجزء الاول ][

( سلطان) كرتون بكل ما تحمل هذه الكلمة من معنى
راسه كبير ومربع ولو تفتحه يمكن تلقى تالي مخ بارد وناشبن في قاعة جمجمته .
. تسميه العربان " كراره " وقيل انه " حكاكه " )
يعني اللي باقي من مخه يالله يمشيه ل يوم السبت !!

بهذه الكلمآت قال لي خالي بدر لما بدينا نتانقش ب سلبيآتنا وايجابيآتنا
حتى اني جلست افكر كثيررررر ل درجه اني تمنيت اني اقدر ادخل براسي ؟
اييييه دخلت راسي وصلت ل المخيخ ولقيته 512 بس
طلعت ودخلت ل المخ ؟
والله يا مخي حوسه مجلدات بكل متسآن وراح اشرح لكم مكونات مخي بالضبط
مير الي طمني اكثر ان العلماء يقولون ان المخ اذا حسيت بصداع وانت تقرأ معناه ان مخك يبدء يتوسع
وفي امل ان شاء الله يصير مخي 4 قيقا

مجلد جديد 1 ( الاحلام )

وجدت احلامي مبعثره احلام فيها من الطفوله لدرجه اني وجدت مقاطع ل توم وجيري ونقار الخشب .؟
ابتعدت عن الاحلام الطفوليه ووجدت احلام اكشن واحلام اصحى بعد ما اشوفها متروع وحالتي حاله
طاحت عيني على مجلد داخل مجلد الاحلام

احلام كل الشباب يحبونها ،

دخلت هذا المجلد وشفت احلامي ، زواج ، بيت ، عمل ،
طلعت من هذا المجلد ودخلت،


مجلد ( الذكريآت )

تكسوآ هذا المجلد بين جوانبه شبآك العنكبوت وغبار الرياض
وذكريات كثيره بس من شفت وجهه عبيدان في المجلد هذا
انسدت نفسي وطلعت وسكرت مخي !!
بس ماتلاحظون احيان لما نحاول نشغل المخ ونفكر
يتنك ويصير تسنه ددسن 83 محروقه الظفيره !
انتهى


][ تفاصيل الروايه الجزء الثاني ][
خطط علميه مدروسه يابو خطط
من بعد ما طلعوا الشعب على سلطان بن فهد هالشي
واخوياي ممسكينها علي وصارت معياره لي
ليش لان اسمي واسم ابوي تسذا (سلطان بن فهد ) ونعم بي
صبر خلني اصب لي فنجال قهوه خارج النص ،
نكمل حديثنا فيه احد يتابع الدوري السعودي للحين ؟؟
بالله راضين عن المستوى ؟؟
لا المنتخب فالح ولا الدوري كويس ؟

من بعد ما شاتو ابو خطط علميه مدروسه ورئيس الفوالين تفائل الشعب خير في نواف بن فيصل
وطلع الثاني مثل عمه المنتخب مدحدر والدوري مخيس ومعروف بطل الدوري من هالحين ابشركم !
ولا يقبلون النقد الهادف البناء ، هذا فيديو ذبه على رئيس الفوالين تابعوه ونرجع نكمل

هذي نهاية الخطط المدروسة يا كبير الفوالين هههههههههههههههه
ازعجونا بالنقد الهادف البناء وملصحه المنتخب ومن هالخراط الفاضي
انتقد المنتخب سلمان المطيويع وانتقد نواف بن فيصل


اول يومك في القناه الخشبيه وبرنامجك كل الرياضه
كنت تطبل وتمدح لهم ويوم قلت الصحيح ططيروك !!
وعلى طول شاتوه الضعيف ؟
خلصنا من الدوري نجي للمشجعين !!

مثال بسيط :
موضوع كاتبه هلالي او نصراوي او اي مشجع تلقى الكاتب حيادي
ويتكلم عن شي ظاهر وكلن شايفه وعارف ان فيه مشكله بالفريق
يجي مشجع هلالي او نصراوي ، ويتكلم عن هذي المشكله

بـ اسلوب راقي لا فيه لا اسائه ولا اهانه لـ احد ، يقراء كذا شخص
من جماهير الفريق يبدون يتكلمون بعيد عن المشكله . اما ي فقراويه
هذا انتم ماتتغيرون ولا يازعيقيه كذا انتم والى
مالانهايه من الي انتم تشوفونه هالايام ولا يحتاج اقوله ،

نكذب الكذبه ونصدقها
انا كـ احد مشجعين نادي النصر المتعصبين سآبقآ المدربي راسي حاليآ
وهـ الكلام راح اوجهه لـ جماهير النصر وادري راح يستغل
بعض ضعاف النفوس بالسب والشتم والكلام يطول عن مثل هالاستغلال .!
لي متى يا اداره النصر وياجماهيرنا نطبل بالعالميه
واحنا مستوانا على المحلي من جرف ل دحديره ؟
اتوقع خلال كم سنه ممكن ننزل لـ الدرجه الاولى

وننافس في الحواري دام هذا تفكيرنا وعقليآتنا ؟
البطولات السابقه والعالميه هذي شي من الماضي وناس
تعبت وشقت لين وصلت لـذاك المستوى في الوقت الماضي ؟
اما الوقت الحالي الي اشوفه انهم يهدمون النصر بكامله :
حزازيات بين اعضاء الشرف .!
كل عضو ماخذو في رايه راح يهاجم النادي وينشر الغسيل بكل مكان .!
لاعبين يلعبون بدون مستوى بدون روح .!

ترو هذا الكلام مو اعمم فيه على كل الجماهير النصراويه انا اتكلم
عن المبزره الي فاهمين التشجيع غلط الي اتبعو سياسه كذبنا الكذبه
وصدقناها والاداره كمان صفت معاهم ولا طورت الفريق الا بلاعبين
انتهت صلاحيتهم وصرفتهم انديتهم لنا بنصف القيمه
وهم مابقي مستوى فيهم الا شي بسييط ؟

النصر راح يتغير اذا اتبعت الاداره سياسه عبدالرحمن بن سعود
سابقآ في اداره النادي واحترام الفريق الخصم .!
لكن الي اشوفه من رؤساء الانديه هلال نصر شباب اتحاد وغيرهم .!
كل رئيس نادي له لزمه تطلع كل سنه .!
يـ بضرب رجال امن او استهزاء او غيرها الكثير . فـ مابلوم
بعض الجماهير اذا اسلوب رؤساء الانديه فيه سب

وانتقام من البعض بالتصريحات وفي الاعلام .!
نبي كل جماهير اي نادي تقبل النقد اذا كان النقد في محله .!
يعني النادي فيه مشكله وتقول هذي المشكله يتهمك انك حاقد ولايبحث حل مشكله ،
ينطبق عليه مثل ماقيل / وين اذنك ياجحا..
وبعضهم يعترف ولاينكر وجود المشكله ويناقشك ومابي اضلمهم
يعجبك بـ تقبله لـ النقد ويتحاور معاك وعسى الله يكثر من هالنوعيات
الي راح تخلي الفئه الثانيه تنقرض وتصبح من الماضي

ألي ابي اوصل له :
نبي ثقافه الحوار بيننا كـ اخوان وكـ مسلمين قبل لا نكون
اعضاء او مشجعين نبي كل شخص يتقبل النقد
اذا ماكان فيه اي اسائه له او لـ اي شخص ،
طول ماكان النقد محترم وبالعكس يخدم ب انا ننتقد المشاكل ونبحث له عن حلول !
مـ بتكلم عن الدوري لان دورينا مافيه اي انصاف ياليت ايام فيصل بن فهد ترجع بس

من بعد ماانهوا عقد قناه ابو ظبي الرياضيه وسلموه الخشبيه المتععه راحت
لامعلقين زي الاوادم ولا تصوير زين !
اختم هذا الفصل بوداعيه شيخ المعلقين [ فارس عوض ]



][ تفاصيل الروايه الجزء الاخير ][
كنت أجبر كسور الناس ان كانت كسور عظام او كسور خواطر!
كانت عيادتي دايم خرشه وعالم داخله وعالم طالعه
اللي يونس وجع ويصيح واللي يصيح وهو مافيه الا العافية عشانه هوّال
على طاري هوّال ترى أحسن فوّال في الرياض " فوال القرموشي "

وكان معي في العيادة ثلاثة من الابطال مالهم شغل ابد
ما غير يتبطحون في العيادة ويحترون بنت تدخل او تفكر بس انها تدخل
يتراهنون على ظلال الآدميه اذا اقبلت ويعرفون البنت من مشيتها
هي بنت والا مطلقه هي طيبه ولا فيها جرح ! (أحم أحم)
هي حامل والا بطنها مليان هواء خاطرها زين والا خاطرها منكسر ..
تحب الفنانين الهنود والا تحب حسين عبدالغني مايدور تصفيق النصراويه

بالعربي .. أبطال ذا الرواية .. هم ذا اللي يتبطحون عندي في العيادة !!
وترى الأبطال في الروايه مهوب صدق
( لايجي احد ويقول وش العاهات اللي تعرفهم الخطرين على المجتمع ؟ )

1- ( عبيدان ) وجهه برئ .. ووكنه على نياتة .. وهو أخبث ما خلق ربي
( من كثر ما يعرف من شغّالات اسمه محفور في صالة المغادرة
بمطار الملك خالد وجنبه قلب عند بوابه الرحلات المغادرة لجاكرتا ) !
من طرائف (عبيدان) انه اذا صار في بيتهم عزيمة كبيره
ودخل المطبخ بياخذ القهوة او الشاهي قامن الشغالات يتميلحن
وكل وحده تضحك من جهه !
يعلّق عبيدان على ذا الموقف ويقول
(الظاهر ان ذا الشغالات يسولفن على بعض
ويكبكبن العشيات حسبي الله عليهن )


2- ( عبدالرحمن ) وجهه طفولي مافيه ولا شعره
وهو عود جن غريب في تصرفاته
ناخذ على سبيل المثال مثلاً .
اصراره على زيارة الحلاق كل يوم مع ان مافي وجهه شعر ؟!

3- ( مطلق ) كرتون بكل ما تحمل هذه الكلمة من معنى
ما غير يدربي راسه مع الشباب ويحتريهم بس يقولون ترى فيه
( قزقزه مع بنت جديده ) سبحان الله دايم اللي عقله دون
شوي يصير نشيط نشااط غير طبيعي

كانوايعتبرون الجيل الرابع لأسرتهم الكبيرة
واللي ما بقى منها إلا جدتهم ( فليحه )
على ذا الاسم اكيد تتوقعون في لحيتها
نقط سود مثل عجايز الأردن !
جدتهم( فليحه ) نموذج للمرأة البطرانه اللي ما عندها في احد

... خذت خمسة رجال كل ما مات
واحد طقت لها ثاني جديد كنهم مواتر !!
يوم تقاعدت وأنقلب راسها
وصارت ( موميا ) الا شوي !
بطلت عروس واعتزلت المجتمع
وألبدت في بيتها المترامي الأطراف

والواقع في شرق مدينة الرياض في حي الروضه !
حيث تكثر سيارات الهوندا وحفلات الزار وممارسة التفحيط
ولعب كرة القدم وخطف المبزرة اللي مصدقين انهم رجاجيل

ومع ان الجدة ( فليحه) كبرت وتقريباً خذرفت الا ان اولادها
ما قدرو يقنعونها تطلع من البيت الكبير وتسكن مع واحدن منهم !

( عبيدان) و (عبدالرحمن ) و (مطلق) ما عرفوا جدتهم الا يوم كبروا
والله يا هم يسمعون بشي اسمه ( صلة الرحم )
وصلهم علم ان جدتهم المصون فليحه
ما عاد تجمّع وبدت تخرّف بقوه !
وان راسها منقلب وما تدري وين الله حاطها فيه ؟

اتفقوا هم الثلاثة
يستغلون بيت جدتهم للمواعيد الغرامية والحفلات بجميع انواعها
كان بيت جدتهم وكر محمي بوجود جدتهم وثقة الجيران !!
كان مزبن أمين وعلى أرقى المستويات

من قوة الوجه يجيب صبّابات في الحفلات
ويقولون ان الحفلة عيد ميلاد جدتهم
وكانت جدتهم من زود الرجه ترقص في حفلاتهم
( تحسب انها صدق وان العرسان أحفادها أو حفيداتها )

وفي يوم من الأيام .. تضايق واحد من جيران جدتهم
من كثر الحفلات والطقطقه وأشتكى على الشرطة !
هدوا .. صاروا مايسوون حفلات الا في كل شهر مره !
حتى ان جدتهم استغربت وقالت :
يالله الخيره وراها قضت عروسكم ؟

وفي احدى ليالي الشتاء الباااااردة >
قدّر الله على جدتهم وغصت بلقمة حنيني مضروب
( مزينته شّغالة ولا وخرت فصم التمر )
وأفضت الي الله فليحه وقضت نحبها !!
ماتت فليحه !!
ومات الأمن والأمان !
وصاروا يضطرون مع البنات
مواعيد في ملاحق بيوتهم !!

في الختام اقول :

اذا شفتو بالروايه فائده اعطوها حقها
واذا مافيه اي فائده انقلوها ل البير

منتديات المحيه لجديد ترحب بكم